Ainaro/MetroFm– Governu Timor Leste liuhusi Autoridade Protesaun Sivil (APC sigla portugés), fó apoiu materiál rekoperasaun ba vítima dezastre naturál iha munisípiu Ainaro.
Materiál ne’e distribui tuir kategoria estragu sira mak hanesan aat totál vítima sira hetan sementi, metal ka besi, no kaleen ho orsamentu to’o dolar rihun ida ba prosesu entrega no konstrusaun, ba kategoria aat naton sira hetan kaleen, metal ka besi, martelu no parafuzu inklui kategoria aat kmaan, vítima sira hetan kaleen, martelu no parafuzu.
Liuhusi reportajen rádiu komunidade Ainaro mai rádiu Metro Fm iha programa Metro Loron Ohin, kuarta feira (10/12/2025) ne’e, Prezidente Autoridade Protesaun Sivil munisípiu Ainaro Jesuíno dos Reis Matos Carvalho, husu ba benefisiáriu atu uza materiál ne’e hodi konstrui fali uma iha fatin seguru no laiha área risku.
“Osan ne’ebé ita tau la’ós ba foti mai kedas maibé bainhira imi hetan dezastre ruma, ha’u nia elementu sira koopera hodi foti dadus sira ne’e, hotu tiha ami sei verifika loloos duni, loos ka laloos. Tamba iha balun la’ós ita dun arbiru maibé dalaruma benefisiariu balun hakarak atu apoiu malu maibé ida ne’ebé vulneravel ne’e labele tama benefisiariu ba dezastre ninia, tamba vuneravel sira ne’e tama lista solidaridade sosiál nian, APC só haree de’it ba vítima dezestre naturál’’, dehan prezidente APC.
Enkuantu Prezidente Autoridade Munisípiu Ainaro Manuela Georgina Carmo Bucar Corte Real mós husu ba povu atu labele fa’an materiál ne’ebé simu, tanba ekipa seidauk remata levantamento no sei kontinua haree situasaun iha fatin, nune’e husu mós atu benefisiáriu sira konstrui metin no tuir rekomendasaun téknika.
“Ha’u husu ba ita boot sira iha ona kareta para depois de simu ne’e, ita boot sira transporta kedas ba ita boot sira-nia fatin”, relata prezidente autoridade Ainaro.
Benefisiáriu Anita Ximenes agradese ba Governu tanba apoiu ne’e importante atu konstrui fali uma sira ne’ebé destruídu durante dezastre.
Totál benefisiáriu mak atus ida tolunulu resin hitu (137), husi Postu Ainaro tolunulu resin ida (31), Hato-Udo ualu (8), Hatu-Builico haatnulu resin neen (46) no Maubisse limanulu resin rua (52), sira hotu simu ona materiál hodi ajuda konstrui fali uma ne’ebé aat.
Tuir dadus Autoridade Protesaun Sivil husi tinan 2024 to’o 2025 iha munisípiu Ainaro, totál uma afetadu mak, aat totál ruanulu (20), aat naton tolunulu (30) no aat kmaan ualunulu resin hitu (87). (Deo/Erny/Ana)
