MetroFM; Konsellu Ministru (KM) hala’o sorumutu iha Palásiu Governu, kuarta feira ne’e, aprova projetu Dekretu-Lei ba alterasaun dahuluk Dekretu-Lei n. 75/2023, loron 15 fulan-setembru, kona-ba orgánika Ministériu Transporte no Komunikasaun nian, ne’ebé aprezenta hosi Ministru Miguel Marques Gonçalves Manetelu.

Diploma ida-ne’e ho objetivu prinsipál atu hala’o reorganizasaun interna ba servisu sira Ministériu Transporte no Komunikasaun nian, ho objetivu ba distribuisaun ida ne’ebé efisiente no produtivu liu kona-ba kompeténsia no tarefa sira iha setór ne’e.

Medida sira ne’ebé agora aprova ona inklui eliminasaun hosi atuál Diresaun-Jerál Transportes no Komunikasoins no kriasaun hosi diresaun-jerál rua ne’ebé keta-ketak – Diresaun-Jerál Transportes no Diresaun-Jerál Komunikasaun nomós kriasaun Gabinete Investigasaun Insidentes no Asidentes Aéreus no Gabinete Dijitalizasaun no Seguransa Sibernétika, hodi hametin prestasaun servisus públikus iha área sira ne’ebé dezenvolve daudaun ne’e.

Biban n’e, Konsellu Ministru mós aprova projetu Dekretu-Lei, ne’ebé aprezenta mós hosi Ministru Miguel Marques Gonçalves Manetelu, ne’ebé estabelese taxa sira ne’ebé tenke selu ba aktu no servisu sira Administrasaun Públika nian relasiona ho veíkulu motorizadu no nia kondutór sira.

Diploma ne’e define no klarifika rejime taxa ne’ebé aplika ba aktu no servisu ne’ebé presta husi Administrasaun Públika iha setór rodoviáriu, hodi garante korrespondénsia entre servisu ne’ebé presta no ninia kustu ida-idak.

Diploma ne’e, entre sira seluk, inklui prosedimentus relasionadus ho matríkula, rejistu, inspesaun veíkulu, emisaun títulu no lisensa sira, no mós ezames no dokumentu sira ne’ebé relasiona ho kondusaun.

Dekretu-Lei estabelese mós regra sira kona-ba kobransa taxa sira, identifikasaun hosi sujeitu pasivu sira (ema ka instituisaun ne’ebé iha obrigasaun selu taxa) no posibilidade ba kobransa ne’ebé hala’o hosi entidade terseira parte sira, tuir termu sira ne’ebé define legalmente, hodi revoga rejime anteriór no prevee nia entrada iha vigór loron 30 hafoin nia publikasaun.

Entretantu, KM aprova mós projetu Dekretu Governu, ne’ebé aprezenta mós hosi Ministru Miguel Marques Gonçalves Manetelu, kona-ba regulamentu atribuisaun númeru matríkula no emisaun no mós tau xapa matríkula ba veíkulu motorizadu sira no nia reboke (karreta ne’ebé la iha motór no dada hosi karreta ne’ebé iha motór).

Diploma ne’e estabelese regra sira ne’ebé aplikavel ba determinasaun númeru matríkula, no mós konfigurasaun, emisaun, renovasaun no afiksasaun ninia xapa sira ba veíkulu motorizadu hotu-hotu no sira-nia reboke, hodi define tipu matríkula oioin, sira-nia estrutura no kódigu identifikasaun sira hosi divizaun administrativa territóriu nian.*

Fontes informasaun ne’e hosi : Portal Governo