MetroFM : Sekretária Estadu Igualdade Elvina Sousa Carvalho hateten, fulan Marsu ne’e loron importante ba Veteranus no mos loron mundial ba feto sira, tanba sira nia luta mak ohin loron Nasaun Timor-Leste, livre, independente, no demokrátika, asuntu ne’e hato’o bainhira sai Inspetora iha serimonia hasa’e Bandeira Nasionál ba fulan Marsu iha Resintu Paláçio Do Govero, Dili Segunda feira (02/03/2026).
“Fulan Marsu sai fulan importante ida ba povu Timor-Leste, tanba iha fulan ne’e selebra eventu nasional no internasional sira ne’ebé iha valor bo’ot ba nasaun, Iha fulan ida ne’e, ita hanoin fila fali kontribuisaun veteranos libertasaun nian no mos komemora International Women’s Day iha loron 8 Marsu,Veteranos sira maka herói sira ne’ebé luta ba ukun-rasik-an no independénsia Timor-Leste. Sira nia sakrifísiu no dedikasaun sai fundamentu ba dezenvolvimentu nasaun ohin loron, Governu no sosiedade presiza kontinua fó respeitu, atensaun no apoiu ba veteranos sira atu sira bele moris ho dignidade”, dehan Membru Governu da Sia ne’e.
Iha parte seluk, Loron Mundial Feto, ne’ebé selebra kada tinan iha 8 Marsu, sai momentu importante atu rekoñese papel feto sira iha família, komunidade no nasaun, Feto sira iha kontribuisaun boot iha área edukasaun, saúde, polítika, ekonómia no dezenvolvimentu sosial.
Selebrasaun ida ne’e la’ós de’it serimónia, maibé mos hanoin kona-ba igualdade jéneru, direitu feto no partisipasaun ativa feto sira iha prosesu dezenvolvimentu nasaun.
Ho nune’e, fulan Marsu la’ós de’it fulan komemorasaun, maibé mos fulan reflesaun no kompromisiu atu valoriza veteranu sira no haforsa papel feto sira iha Timor-Leste.
“Fulan Marsu fulan ida importante tebes, ita iha komemorasaun rua mak ida mak loron tolu fulan Marsu hanesan loron veteranus, no loron ualu fulan Marsu hanesan loron mundial ba Feto, loron ne’e importante mai ita hotu atu halo reflesaun, hodi hare ba sira nia luta, tanba objetivu hosi sira nia luta mak ohin loron ita saun nasaun soberania, livre, no independente”, katak Sekretária Estadu Iguladade Elvina Sousa Carvalho.
Membru governu ne’e mos hatutan ba entidade hotu hotu liu ba funsionariu públiku presiza promove igualdade jéneru iha ida idak nia servisu fatin, kria ambiente ne’ebé di’ak ba igualdade jeneru, no lIvre hosi aktu violensia.
Partisipa iha serimonia ne’e Sekretária Estadu Komunikasaun Sosial, Expedito Loro Dias Ximenes, Sekretária Esatdu Igualdade, Elvina Sousa Carvalho, Prezidente Funsaun Públika, Agustinho Letênsio de Deus, Diretúr Komunikasaun Sosial, Florindo da Costa, asesor internasional, no nasionál, PNTL, F-FDTL no funsionariu sira. (Luis)
