MetroFM; Governu konstitusionál da-sia liu hosi Sekretaria Estadu Komunikasaun Sosiál (SEKOMS) apoiu fundu tranferensia Públika tinan 2026 ba radiu komunidade sanulu resin haat (14) iha Palácio Governu Dili, tersa feira (21/04/2026) ne’e.
Tuir Sekretária Estadu Komunikasaun Sosiál Expedito Loro Dias Ximenes informa, ohin sekretaria estadu komunikasaun sosiál reprezenta governu asina kontratu ho radiu komunidade sira iha teritóriu Timor-Leste.
“Sekretáriu Estadu Komunikasaun Sosiál, reprezenta governu asina kontratu ho radiu komunidade iha teritoriu Timor laran tomak, oras ne’e dadaun ita iha radiu komunidade hamutuk rua nulu resin ida (21), maibé radiu komunidade balun mak labele asina tanba sira falla iha jestaun no ohin ita asina kontratu ho radiu komunidade hamutuk sanulu resin haat(14)”, dehan Ezekutivu ne’e.
Governante ne’e mos hatutan tinan tinan governu sempre apoiu radiu komunidade sira, tanba sa, tanba governu konsidera radiu komunidade sira hanesan front line ka lina frente ba informasaun, tanba mak bainhira ami vizita radiu komunidade sira hodi hare sira nia jestaun.
Expedito Loro Dias Ximenes rekoñese radiu komunidade ne’e hari hosi komunidade no kobertura ka fó sai informasaun liu ba agrikultor sira.
“Ami sei konsulta tanba radiu komunidade ne’e forma hosi komunidade, mak nia kobertura ka atividade ne’ebé halo iha munisipiu, mak nia atividade ne’e fó atensaun makas liu ba komunidade agrikultor sira nian, atividade joven rezistensia sira nian, atividade feto potensiál sira, no mos atividade agrikultor sira ne’ebé halo produsaun iha toos no natar, no mos joven sira ne’ebé mak talentu di’ak iha múzika bele konvida sira mai halo talk show iha estudiu radiu komunidade sira”, tenik membru governu ne’e.
Nia dehan orsamentu ne’ebé governu apoiu iha tinan ida ne’e ba radiu komunidade sira bazeia ba sira nia proposta, la’os fahe tuir hakarak, maibé tuir sira nianproposta, tanba ne’e sira ne’ebé halo proposta di’ak, halo relatoriu tuir regras, tanba ne’e sira hetan tuir sira nia proposta.
Iha sorin seluk jestor radiu komunidade 1912 Manufahi Vasco da Costa Mendes hateten, agradese ba governu da sia ne’ebé kontinua apoiu ona radiu komunidade sira iha teritoriu Timor-Leste, no dezenvolve radiu komunidade sira, entaun asina kontra ohin hodi hametin relasaun entre Sekretariu Estadu Komunikasaun Sosiál ho radiu komunidade sira, nune’e bele hasa’e servisu radiu komunidade sira nian, liu liu halo produsaun informasaun sira kona ba produsaun lokál sira hanesan argikultor sira, tanba radiu komunidade hanesan lina frente ba komunidade sira, entaun presiza fó sai informasaun komunidade sira nian.
Totál radiu komunidade ne’ebé asina kontratu 14 mak radiu komunidade Vox Populy Lospalos, Radiu komunidade Povu Viqueque, Radiu komunidade Lian Matebian, Radiu Komunidade Coulelemai Sahe Bucoli, Radiu Komunidade Iliwai Manatuto, Radiu komunidade Mauloko Maubisse , Radiu Komunidade 1912 Manufahi, Radiu Komunidade Café Ermera, Radiu Komunidade Defisiensia Timor Leste, Radiu Tokodede Liquiça, Radiu Komunidade Maliana, Radiu Komunidade Balibo 5, Radiu Komunidade Atoni Lifau, Oecusse no Radiu Komunidade Lorico Lian.
Entretantu radio komunidade ne’ebé durante ne’e Sekretaria Estadu Komunikasaun Sosiál (SEKOMS) fo apoiu hamutuk rua nulu resin ida (21) husi total hirak ne’e radio komunidade sanulu resin haat (14) maka asina ona kontratu no seluk sei hala’o iha faze tuir mai.*
