MetroFM/RCIM; Feto potensiál sira iha Munisípiu Manatuto komesa fó atensaun ba dezenvolvimentu kapasidade no preparasaun atu partisipa iha lideransa no poder lokal iha futuru.

Prezidente Asosiasaun Feto Potensiál Manatuto, Maria Elidia Soares Siqueira, hateten iha nia knar fatin iha 25 Agostu 2026, katak preparasaun ba feto potensial sira importante tebes atu asegura sira-nia prontidaun atu partisipa iha prosesu lideransa no poder lokal.

“ Durante prosesu preparasaun ne’e, Asosiasaun Feto Potensial Manatuto prepara ona proposta atu submete ba Konsellu Administrativu no Sosial (KAS), ho objetivu atu hetan apoiu orsamentál ba atividade preparasaun feto potensial sira atu partisipa iha lideransa no poder lokal. Atividade preparasaun ne’e hala’o iha faze rua. Iha faze dahuluk, asosiasaun hala’o formasaun kona-ba harii kapasidade no dezenvolve poténsial feto sira iha Manatuto, inklui iha postu administrativu sira. Formasaun ne’e hala’o iha Postu Administrativu Manatuto Vila, Laclo no Laleia. Relatóriu kona-ba atividade hirak ne’e submete ona, no asosiasaun sei kontinua atividade preparasaun iha fulan sira tuirmai, ho objetivu atu atinje rezultadu to’o 50 porsentu,” dehan Maria Elidia.

Preparasaun no partisipasaun feto sira iha lideransa no poder lokal importante tebes, liuliu hodi dezenvolve rekursu umanu feto sira nian iha Munisípiu Manatuto.

Tuir Maria Elidia hateten, preparasaun ne’e hala’o liuhusi kapasitasaun no formasaun ne’ebé fó konesimentu kona-ba lideransa no poder lokal. Formador sira mai husi Sekretaria Estadu Igualdade no Inkluzaun no Comisaun Nasional Elisoes, ne’ebé fó materiál formasaun kona-ba lideransa transformativu, public speaking no aspetu jurídiku kona-ba poder lokal.

Asosiasaun Feto Potensial Manatuto konsidera atividade preparasaun ne’e importante atu fó oportunidade ba feto sira, inklui feto polítika, intelektual, ativista no finalista universitária, atu dezenvolve sira-nia kapasidade no prepara-an hodi aproveita oportunidade lideransa iha poder lokal iha futuru. * (Job/Laurenti)