MetroFm/RKM; Komunidade iha Suku Ritabou, Postu Administrativu Maliana Vila, Munisípiu Bobonaro, enfrenta difikuldade asesu ba bee moos tanba bailoron naruk ne’ebé halo bee matan no posu balu maran, no fonte bee sira seluk menus.
Xefe Suku Ritabou Maxiano de Araujo Santos, hateten iha 9/09/2026 katak, situasaun ne’e afeta komunidade iha aldeia haat (4). Sistema bee moos ne’ebé eziste seidauk konsege responde ba nesesidade komunidade nian tanba kuantidade bee ne’ebé disponivel menus.
“Bee moos laos laiha hotu, maibé bee ne’ebé kanaliza ba komunidade mai tuir oras no kuantidade ne’e la sufisiente atu responde ba nesesidade komunidade, Tanba limitasaun bee, komunidade balu hahú buka alternativa rasik, inklui dada bee husi mota, atu responde ba nesesidade uma-kain sira. komunidade mos antes halo inisiativa hodi harii posu no halo perfurasaun ba fonte bee. Maibé, fonte bee balu agora maran tanba bailoron naruk”, dehan Lideransa Komunitaria ne’e
Aleinde problema disponibilidade bee, autoridade lokal mos enfrenta dezafiu kona-ba koperasaun komunidade ho ekipa téknika Servisu Munisipiu Agua no Saneamentu (SMAS), liuliu iha implementasaun sistema kontadór bee iha uma-kain.
Tuir Xefe Suku Maxiano, komunidade utilizadór sira tenki kumpre regra no halo kontribuisaun ba servisu bee. Komunidade ne’ebé la kumpre obrigasaun bele hasoru desliga ligasaun bee husi ekipa téknika. bainhira komunidade kumpre ona regra no obrigasaun ne’ebé eziste, ekipa téknika bele halo ligasaun bee sai fali. Autoridade lokal konsidera katak problema bee moos ne’e bele afeta atividade loroloron komunidade, inklui estudante sira ne’ebé presiza bee ba nesesidade uma-kain no eskola.
Autoridade lokal hateten sei kontinua koopera ho entidade relevante sira hodi identifika no hadi’a fonte bee ne’ebé bele fornese bee ba komunidade.
Autoridade mos apela ba komunidade atu koopera iha jestaun bee, kumpre regra utilizasaun no kontribuisaun, nune’e sistema bee bele kontinua fornese servisu ba komunidade. Problema bee moos ne’e mos hatudu impaktu bailoron naruk ba disponibilidade rekursu bee iha komunidade maliana, ne’ebé obriga komunidade balu buka fonte alternativu atu garante nesesidade bee loroloron. (Job)
