Dili, 28 Maiu 2025 – Administrador Postu Administrativu Laclubar, Raimundo Soares, lori komunidade hato’o agradesementu ba Politika IX Governu Konstitusional liu husi Sekretaria Estadu ba Komunikasaun Social – SEKOMS hodi estabelese Estasaun Radiu Komunidade iha Postu Administrativu Laclubar.

 “Hau Administrador Postu lori komunidade Laclubar tomak hato’o agradesementu no obrigado ba IX Governu Konstitusional ho politika ida liu husi Sekretaria Estadu ba Komunikasaun Social  tanba Laclubar oras ne’e marka tan istoria ida iha tempu Ukun Rasik A’an ne’e, bele instala tan Radiu ida hodi bele transmite informasaun a nivel lokal nian, prosesu servisu nian tantu husi Estadu, governu no komunidade nian ba ema hotu atu hatene situasaun real iha Laclubar”, tenik APA Laclubar

Administrador ne’e mos informa katak durante ne’e, ekipa husi parte Administrasaun Postu Laclubar servisu hamutuk ona ho Ekipa husi Diresaun Nasional Dezenvolvimentu Media (DNDM) – SEKOMS nian hodi identifika fatin no halo instalasaun ba Estasaun Radio Comunidade iha Laclubar.

Atu garante sustensabilidade radio komunidade Laclubar, Administrador Postu ne’e hateten presija iha planeamentu ne’ebe diak atu nune’e bele garante partisipasaun ema hotu nian.

“Ita hotu hatene kuandu hari’i ona buat ida ne’ebe di’ak ekipamentus no materiais ne’ebe adekuadu no mos tenke iha planu ida ne’ebe furak halo planeamentu ba Jestaun, ba finansiamentu, ba partisipasaun komunidade nian no ba apoiu institusional nian atu nune’e ita nia radiu ne’e, bele la’o ho diak, ” Administrador ne’e hateten.

Ikus liu Administrador Postu Administrador Laclubar ne’e husu ba entidades no komunidade iha Postu Laclubar atu servisu hamutuk hodi promove informasaun konaba kultura, edukasaun atu nune’e publiku bele akompanha konaba saida maka akontese iha Postu Laclubar ne’e rasik.

“Radiu no postu ne’e espasu nakloke ba ema hotu, ba komunidade sira hotu, valoriza ita nia lian, lideransa lokal, eskola, joventude, profesional sira, seguransa no kultura, nune’e  populasaun bele akompanha notisia lokais, avizus importunate sira ne’ebe akontese iha ita nia nasaun nia laran mos ita nia postu ne’e rasik.

Administrador ne’e mos kontinua husu ba governu liu husi SEKOMS atu kontinua fo tulun ba estasaun radio ne’ebe estabelese dadaun iha Laclubar nune’e bele garante radiu ninia sustentabilidade hodi fornese informasaun ba povu no nasaun ida ne’e.

Hakerek testu : Waitila

Editor : Ana