Konsellu Ministrus aprova projetu Dekretu-Lei, ne’ebé aprezenta husi Ministru Defeza, Donaciano do Rosário Gomes, kona-ba kondisaun sira atribuisaun subsídiu sira no suplementu remuneratóriu sira nian ba FALINTIL-Forsa Defeza Timor-Leste (F-FDTL), iha Reuniaun Konsellu Ministru iha Palácio Governu, kuarta feira (04/06/2025).
Objetivu husi diploma ida-ne’e mak atu regula no atualiza loloos suplementu sira ne’ebé fó ba militár F-FDTL sira, ne’ebé aprova hosi Dekretu-Lei n. 34/2021, loron 22 fulan-dezembru, altera hosi Dekretu-Lei n. 85/2022, loron 23 fulan-novembru, hodi rekoñese ezijénsia espesífika sira karreira militár nian no nesesidade atu dignifika servisu ne’ebé presta ba Nasaun ne’e.
le’e mos notisia : Sorumutu Konsellu Ministrus nian iha loron 4 fulan-juñu tinan 2025
Medida ne’e hakarak mós atu hadi’a lakuna no diskrepánsia sira ne’ebé eziste iha rejime anteriór, hodi konsidera evolusaun hosi kustu moris nian no reforma foin lalais ne’e iha administrasaun públika.
Proposta ne’e aplika ba militár ativu ka rezerva hotu-hotu, iha servisu efetivu, no estabelese valór no kondisaun sira atu atribui suplementu oioin, hanesan suplementu ba kondisaun militár, suplementu ba atividade espesiál, suplementu frekuenta kursu iha estranjeiru, suplementu ba komandu no xefia, subsídiu transporte, subsídiu ba dezlokasaun servisu no subsídiu alimentasaun nian.
Hodi define kritériu uniforme no transparente atu fó apoiu hanesan ne’e, diploma ne’e asegura jestaun rekursu públiku sira ida ne’ebé efisiente liu no promove justisa no ekuidade iha Forças Armadas nia laran.
Autorizasaun ba atribuisaun suplementu ida-idak sei depende ba proposta husi unidade militár no despaixu husi Xefe Estadu Maiór-Jenerál Forsa Armada. Suplementu ne’e sei garante de’it durante períodu iha ne’ebé mantein kondisaun sira ne’ebé justifika nia.
(komunikado Imprensa)
