Bobonaro (MetroFM) : Komunidade sira susar asesu ba bee moos tanba rai-lakan estraga bomba bee moos iha Suku Hataz postu administrativu Atabae, munisipiu Bobonaro.
Liuhusi rádiu komunidade Maliana ho jornalista Eva Sidonia relata mai rádiu Metro FM, tersa-feira (10/06/2025) katak, komunidade aldeia rua daudaun ne’e labele asesu bee moos iha suku Hataz.
Xefe suku Hataz Justino Laku Mali hateten, railakan estraga eletrisidade no bomba be moos iha fulan fevereiru liu-ba komunidaed sira obrigadu tenke lao distánsia kilometru rua (2) hodi kuru bee moos to’o ohin loron.
“Rai lakan fera tiha ha’u mai hato’o relata tiha iha postu Atabae to’o agora rezultadu seidauk iha pedidu ami seidauk hato’o tanba ne’e ami liuhusi postu mai munisipiu, tanba ne’e mak komunidade balu kuru bee iha mota no balun iha bee privadu ka bee matan rasik sira ne’ebé laiha bee matan entaun ba kuru ema nain la fó, ha’u hanoin mak ne’e tanba importante tempu badak governo bele ajuda ba haree ho matan para bele hadia fali rai-lakan fera ne’e maioria iha ne’e iha aldeia rua, Aidaba leten no Aidaba Salalan iha faillansu PNDS nian hodi muda tiha iha fulan fevereiru ne’e mak rai lakan fera tiha meteran no fiu sira ne’e ahi han hotu”, dehan xefe suku Hataz.
Xefe suku ne’e afirma tan katak, daudaun ne’e sira hato’o ona pedidu ba Bee Timor-Leste Empreza Públika (BTL EP), atu rezolve maibé sedauk iha resposta no nia husu atu governu rezolve imediata sasan sira ne’ebé hetan estragu husi rai lakan ne’e atu nune’e komunidade sira bele asesu hikas ba bee moos iha suku ne’e.
Entretantu suku Hataz iha aldeia haat (4) mak hanesan, aldeia Aidaba Leten, Aidaba Salalan, Biamaraen no Boloi.
To’o informasaun ne’e fó sai seidauk hetan konfirmasaun husi parte Be’e Moos Timor Leste Empreza Públika (BTL, EP). Munisipíu Bobonaro
Hakerek Nain : Elidio Castro
Editor : Ana da Costa
