Atauro/ MetroFM : Komunidade iha autoridade administrativu Atauro kontinua nafatin produz roupa tradisionál ne’ebé beiala sira husik hela iha Atauro ho naran Hirik Laed (lian materna Atauro) ka tali-tahan.
Liuhusi rádiu komunidade Atauro, jornalista Angelica Monteiro ba rádiu Metro Fm, kuarta feira (11/06/2025) informa, komunidade iha Atauro soru roupa tradisionál ne’e beiala sira Atauro uza hodi hatais, no wainhira beiala sira koñese ona hatais roupa iha tempu ne’ebá sira hahú halo ona tali tahan hodi uza hanesan roupa ba sira-nia isin.
Entrevista ida ne’ebé rádiu komunidade Atauro hala’o ho membru grupu Rapin Hirik Domingas Soares hateten, kontinua konserva hatais tradisional ne’ebé beiala sira husik hela.
“Durante ne’e ami iha grupu Rapin Hilik ne’e produz fila fali beiala sira-nia roupa ne’ebé beiala sira uza iha tempu ne’ebá, sira-nia tempu roupa laiha sira halo tali-tahan no sai hanesan lipa hodi taka sira nia-an, avo sira husik hela mai ita agora ami hakarak halo fila fali, inisiativa ne’e mosu tamba Amo ida naran Luis mak mai husu tuir fali no haruka ami halo fila fali ropa beiala nian ne’e”, dehan Domingas.
Domingas mós afirma, roupa tradisonál ne’ebé sira konserva fa’an fali ba turista sira ne’ebé vizita Atauro, no hetan rendimentu nune’e mós fa’an ba kooperativa sira hodi produz ba pasta nune’e fa’an fali.
Nune’e, Domingas Soares agradese tebes tanba husi konserva no produz hatais tradisonál ida ne’e bele hetan rendimentu hodi sustenta familia.
Hakerek testu : Angelica Monteiro & Elidio Castro
Editor : Ana da Costa
