SEKOMS LANSA RÁDIU KOMUNIDADE LACLUBAR LIAN IDATE

Sekretáriu Estadu Komunikasaun Sosiál Expedito “Loro” Dias Ximenes asina plaka no asisti diretamente hosi autoridade sira munisipiu Manatuto no konvidadu sira iha ambitu lansamentu radio komunidade Laklubar 99.1 Mhz, sabado fim de semana ne’e (14/06/2025)

Laclubar (MetroFM); Sekretaria Estadu Komunikasaun Sosiál (SEKOMS), lansa rádiu komunidade Laclubar lian Idate ho frekuénsia 99.1 mhz, iha postu administrativu Laclubar, munisípiu Manatuto,sábadu (14/06/2025).

Sekretáriu Estadu Komunikasaun Sosiál Expedito “Loro” Dias Ximenes hateten, ezisténsia rádiu Laclubar lian Idate, hanesan meiu komunikasaun ida ne’ebé semo iha anin, no rádiu ida ne’e mak besik liu-ba komunidade sira, hodi habelar informasaun liu-liu ba agrikultór sira, negosiante sira, no mos promove kultura rai Laclubar nian.

“Postu Laclubar inan-aman sira ohin marka tan istória ida iha rai Laclubar, ksolok tebes ba ita hotu, halibur iha fatin ida ne’e hodi halo inagurasaun ba rádiu komunidade Laclubar ho lian Idate, ho nia frekuénsia 99.1 mhz, rádiu ida ne’e la’os de’it nia frekuénsia, rádiu ida ne’ebé semo iha anin,ida ne’e prova katak iha Laclubar iha lian, lian ne’e importante tebes, lian ida ne’ebé sei hato’o istória, ba agrikultór sira, ba negosiante sira, liu liu negosiante kiik sira iha postu Laclubar, hodi habelar no promove kultura rai Laclubar nian, no esperansa ba preokupasaun sira durante ne’e, komunidade Laclubar buka hela no hein hela”, dehan Expedito.

Diretor DNDM, Manuel de Fatima intrega akta lista ekipamentu radio nian ba Administrador Postu Administrativu Laclubar-Manatuto. (Sabado, 14/06/2025)

Fatin hanesan reprezentante Prezidenti Autoridade munisípiu Manatuto atuál sekretária asuntu sosiál Natalino Cardoso afirma, rai Laclubar marka tan istória, ne’ebé esforsu tomak husi SEKOMS, bele realiza no atinji ona mehi boot durante tinan naruk povu nia lian iha area remota susar tebes atu asesu informasaun ba iha nível nasionál.

Natalino mós dehan, estabelesimentu no inagurasaun rádiu komunidade ida ne’e, ho hanoin ida bele ajuda ona komunidade Laclubar bele asesu ba informasaun sira hotu, bele asesu husi nível nasionál ba iha postu, nune’e mós saida de’it mak hala’o iha postu Laclubar no bele ajuda ona maluk sira seluk ne’ebé namkari iha teritóriu tomak, ho estabelesimentu rádiu ida ne’e komunidade sira bele asesu ona informasaun.

Nune’e mós administradór postu administrativu Laclubar Raimundo Soares, lori komunidade Laclubar tomak fó agradese ba SEKOMS.

“Ho fuan boot ohin mai instala tan rádiu komunidade iha rai Laclubar, marka tan istória boot ida iha Laclubar, ho nune’e komunidade sira hela dook hosi sidade sira bele fó sira-nia hanoin ka sira-nia dúvida no rekomendasaun ruma liu hosi rádiu ida ne’e, katak hosi nasionál to’o munisípiu bele rona ona povu Laclubar nia lian”, hateten Raimundo.

Abilio Martins nu’udar komunidade Laclubar sente kontente tebes tanba esforsu husi governu da-sia nian, liuhusi SEKOMS, harii tan rádiu komunidade Laclubar lian Idate, ho presenza rádiu ida ne’e komunidade Laclubar bele asesu ona informasaun iha rai Laclubar.

Totál populasaun iha postu administrativu Laclubar tinan 2025 hamutuk rihun sanulu resin neen, atus hitu limanulu resin ualu (16.758), iha suku ualu (8) no aldeia ruanulu resin sia (29).

SEKOMS harii ona rádiu komunidade iha teritóriu hamutuk ruanulu resin ida (21), no iha fulan outubru mai SEKOMS sei lansa tan rádiu fronteira Balibo, iha postu administrativu Balibo, munisípiu Bobonaro.

*Hakerek testu : Luis Lopes

*Editora : Ana