RCS-Bucoli/MetroFM; Autoridade lokál suku Bucoli, postu administrativu Baucau Vila, munisípiu Baucau, hahú hala’o resensiamentu eleitorál iha loron 23 fulan juñu tinan 2025 to’o remata, ba populasaun Bucoli hodi re-atualiza dadus komunidade nian ne’ebé antes ne’e halo ona iha tinan 2010 liu-bá.

Xefe aldeia Lulihene Jaime da Silva hateten, fixa família ne’ebé autoridade lokál sira rejista iha tinan 2010, ka tinan 15 liu-bá la kondiz ona ho kondisaun agora, liu-liu iha abilitasaun literária.

“ Rejistu populasaun iha tinan 2010, atu halo re-ajustamentu ou re-atualizasaun, populasaun iha Bucoli nafatin sira iha ne’e ka lae, tamba fixa familia ne’ebé ami rejista iha tinan 2010, liu-liu kona-ba sira-nia abilitasaun literária la kondiz ho tinan 15 ne’ebé liu ba kotuk, tanba ne’e mak hakarak ka lakohi ami tenki halo fali re-ajustamentu, wainhira ami inísia ho arolamementu ida ne’e balun iha eskola primária, balun pre-sekundária , balun iha sekundária, maibé kondisaun to’o agora ne’e balun iha ona ensinu superior. Tanba ne’e mak hakarak ka lakohi ami halo fali resensiamentu populasaun 2025 atu identifika lolos dadus sidadaun Bucoli nian’’, dehan Xefe aldeia Lulihene iha sede suku Bucoli kinta feira ne’e (03/07/2025).

Nia hatutan iha resensiamentu ne’e foti mós dadus kona-ba, komunidade nia animál, plantasaun, saneamentu, bee moos, eletrisidade, kondisaun uma no rai.

“Re-ajustamentu ida ne’e laos foka ba populasaun de’it, maibé ami mós rejista kona-ba Plantasoens, kondisaun uma ne’e oinsá, ema nia profisaun, nia iha sintina ka lae, bee moos iha ka lae, eletrisidade no liu-liu kona ba rai, rai privadu no rai doasaun’’, Nia hatutan.

Resensiamentu ne’e hala’o iha sede suku Bucoli, dokumentu sira ne’ebé presiza lori mak hanesan, xefe família prepara foto koloridu 3×4 tahan rua (2), fixa família tuan, kartaun eleitorál xefe família no membru família ne’ebé karik iha ona, sertidaun batizmu, sertidaun RDTL no billete identidade (BI).

Iha resensiamentu ne’e sei permite de’it xefe família mak bele ba rejista no sei la rejista wainhira ema seluk mak lori dokumentu sira ba, no daudaun ne’e xefe família atus ida resin mak tuir ona rejista.

*

Hakerek testu : Zaly 

Editora : Ana