MetroFM; Timor Leste sai uma na’in ba jogu Comunidade dos Países da Língua Portuguesa (CPLP), sei promove poténsia Timor ba Europa Ázia no Amérika Latín.
Liuhusi programa Governo Responde iha rádiu MetroFM, sesta feira (11/07/2025) ne’e, Ministru Juventude Desportu, Arte no Kultura (MJDAK), Nélio Isaac Sarmento hateten, liuhusi kapasidade ne’ebé Timor Leste iha mak atividade desportu.
“Wainhira ita tama ona iha organizasaun ne’e iha servisu barak merese ita atu oferese hanesan país estadu membru ida, liuhusi kapasidade ne’ebé ita iha atividades ida mak desportu ne’e rasik país estadu membru sira hotu husu Timor bele ka lae sai uma na’in ba eventu desportu ne’e, ita halo konsulta no hola desizaun hodi simu eventu importante ne’e, no ha’u orienta ona tékniku sira hodi servisu no uza oportunidade desportu ne’e la’ós ita maka’as iha área desportu hotu ita uza hanesan meius ida sei promove poténsia Timor ba Europa Ázia no Amerika Latina”, dehan Nélio.
Governante ne’e akresenta tan, país sira iha Europa no Amérika Latín rekoñese, Timor Leste país ida ne’ebé iha potensialidade oioin nune’e sira mai aproveita hodi promove potensialidade iha setór kultura no sósio-ekonómika sira bele haree no kopera di’ak hodi dezenvolve liu tan.
Entretantu nasaun ne’ebé ko’alia lian portugés inklui iha komunidade CPLP mak hanesan, Portugal, Moçambique, Cabo-Verde, Brasil, Guiné Bissau, Guiné Equatorial, São Tomé e Príncipe, Angola, no Timor Leste.
*
Hakerek Testu : Elidio
Editora : Ana
