MetroFM-Dili; Governu da-sia liuhusi Ministériu Agrikultura Pekuária Peska no Floresta (MAPPF) fó apoiu ba sentru treinamentu pekuária iha munisípiu lima (5) mak hanesan, sentru Pato iha munisípiu Lautem, Raitahu munisípiu Viqueque, Natarbora munisípiu Manatuto, Dotik munisípiu Manufahi no Korluli munisípiu Bobonaro.

Liuhusi entrevista iha rádiu MetroFM ho programa “Governu Responde”, segunda feira (14/07/2025) ne’e, Sekretáriu Estadu Pekuária José Vieira de Araújo hateten, governu foka liu hodi tulun sentru sira ne’e ho objetivu atu hasa’e kriasaun fini animál no fó formasaun ba rekursu ne’ebé iha tuir planu ba oin atu alarga tan ba munisípiu seluk.

“Sentru ne’ebé eziste iha mós programa treinamentu tékniku ho engeñeriu ka pekuáriu atu nune’e funsionariu sira ne’e bele halo sira-nia funsaun ho di’ak iha sentru lima ne’e. Sentru ne’e fó mós formasaun ba oinsá haki’ak animál no kriasaun ai-han animál nian, konforme ita-nia órganika pekuária e peskas iha diresaun tolu mak hanesan diresaun nasionál pekuária, segundu mak diresaun nasionál veternária no terseriu mak diresaun nasionál teknolojia prosesamentu produtus pekuária tanba ne’e atividade ida mak sentru treinamentu pekuária, nonu governu hakarak haforsa tan servisu ne’e hodi bele hasa’e kriasaun animál komersiál sira”, hateten Sekretáriu Estadu Pekuária

Entretantu Sekretáriu Estadu ne’e relata, iha mós diresaun ida prevee orasamentu husi subvensaun públika hodi apoiu grupu sira, tanba ne’e diresaun simu ona proposta atus tolu liu no halo hela matadalan ka dekretu Lei ida hodi bele guia hela proposta hirak ne’e.

*

Hakerek: Elidio/Job

Editor: Ana