MetroFM; Envolvimentu Asosiasaun Komunidade Progresu (AKP) iha Timor Leste, atu apoiu ba Instituto Nacional Combate HIV-SIDA (INCSIDA) hodi halo prevensaun ba moras HIV-SIDA (Human Immunodeficiency Virus – Acquired immunodeficiency Syndrome).
Liuhusi entrevista ba programa Kuida Saúde iha rádiu MetroFM, kinta feira (17/07/2025) ne’e, diretór Asosiasaun Komunidade Progresu (AKP) Brigal Ferreira hateten, asosiasaun ne’e iha vizaun prinsipál tolu ne’ebé sai hanesan xave hodi prevene moras HIV-SIDA.
“Organizasaun ne’e iha vizaun tolu hodi prevene moras ne’e mak hanesan, zero HIV-SIDA, ema labele mate tan moras HIV-SIDA no zero diskriminasaun ba ema moras HIV-SIDA iha Timor Leste, moras HIV-SIDA ne’e moras universál e koñesidu ho ida ne’e ita mós iha ezisténsia xave sira iha timor hanesan mane ne’ebé halo relasaun seksuál ho mane transjender inklui mós ema traballu seksu sira ne’e mak organizasaun ne’e atu haree, mós diskriminasaun sira ba ema ho moras HIV-SIDA”, dehan diretór AKP.
Diretór ne’e salienta, estratejia ne’ebé organizasaun ne’e uza maka oinsá atu eduka komunidade sira kuida saúde no prevene-an husi moras HIV-SIDA.
“Saida mak ami halo ona maka ida primeiru liu estratejia ne’ebé ita uza daudaun maka estratejia edukasaun the pare, ita duni ba mudansa hahalok ba sira ne’ebé moris iha hahalok risku liu-liu sira ne’ebé mak halo relasaun seksuál la uza kondom, ita mós hanorin sira oinsá halo relasaun seksuál ida ne’ebé seguru, halo mós distribuisaun materiál prevensaun sira hanesan kondom, pamfletu sira no halo mós materiál prevensaun sira ba komunidade em jerál”, hateten Brigal.
Asosiasaun ne’e mós oferese atendimentu teste ba HIV no moras hada’et relasaun seksuál ba populasaun xave sira maibé la taka dalan ba públiku.
Diretór Asosiasaun Komunidade Progresu ne’e husu nafatin ba ema hotu atu prevene-an, labele halo stigma no diskriminasaun ba ema seluk inklui prevene-an husi moras HIV-SIDA, enkuantu atividade teste ne’e hala’o iha Díli no munisípiu sira hotu.
*
Hakerek testu : Elidio/Job
Editor : Ana
