MetroFM/Atauro; Komunidade suku Makadade, aldeia Anartuto, autoridade administrativa Atauro, hala’o serimónia kultura anuál kolleta bua hodi kontinua obra bei’ala sira nian.
Liuhusi reportajen husi jornalista rádiu komunidade Lian Manu Koko Atauro Angélica Pacheco ba rádiu MetroFM iha programa Metro Loron Ohin, kuarta feira (23/07/2025) ne’e, xefe suku Makadade Jeremias Gomes hateten, atividade kolleta bua ne’e hahú kedas husi bei’ala sira no molok hala’o atividade ne’e konsellu suku sira tenke preparadu hodi nune’e promove nafatin atividade ne’e.
“Ha’u hanoin ita selebra ne’e husi kedas ita-nia bei’ala sira até agora ita sei promove nafatin husik hela mai ita, la lembra selebrasaun ne’e ba dala hira ne’e maibé ne’e hanesan eransa husi bei’ala sira ba ita, ami konsellu suku sira halo preparasaun ho mós juventude sira hodi hato’o mós proposta ba Ministériu Turizmu hodi hala’o atividade ne’e”, hateten xefe suku Makadade.
Xefe suku ne’e mós afirma, atividade seluk husi kolleta bua iha mós atividade feira hanesan ai-han lokál no grupu arte lokál sira fa’an sira-nia produtu iha feira ne’e.
“Husi atividade ne’e mós ita prienxe mós feira tradisionál husi grupu tradisionál ai-han lokál sira no artezenal sira tau sira-nia sasan iha fatin kolleta ne’e bele lori mós turista sira hodi hare direta produtu saida mak suku ne’e iha”, dehan autoridade lokál ne’e.
Entretantu partisipa iha serimónia kolleta bua ne’e prezidente autoridade munisípiu Liquiça, xefe suku sira, governu lokál no nasionál inklui suku viziñu sira iha autoridade administrativa Atauro no atividade ne’e hala’o hahú husi loron segunda to’o kuarta feira ne’e.
*
Hakerek testu : Elidio/Angel
Editora : Ana
