MetroFM; Sekretaria Estadu Protesaun Sivíl (SEPS) liuhusi Autoridade Proteção Civil (APC), realiza workshop kona-ba validasaun nasionál ba manuál avaliasaun risku dezastre no sentru evakuasaun emerjénsia, ne’ebé hala’o iha otél Luz Clarita, Díli, kuarta feira (23/07/2025) ne’e.
Objetivu husi workshop ne’e hanesan konsulta nasionál ida kona-ba projetu validasaun manuál ba avaliasaun risku dezastre no sentru evakuasaun emerjénsia ne’ebé ekipa APC estabelese ona iha munisipiu rua mak hanesan, Viqueque no Covalima hodi fó atendimentu ba vítima sira ne’ebé afeta risku dezastre naturál.
Sekretáriu Estadu Protesaun Sivíl Domingos Mariano Reis hateten, importánsia husi workshop kona-ba padraun operasionál prosedur ba asesmentu risku dezastre no sentru evakuasaun emerjénsia ne’ebé hetan apoiu husi União Europeia ba autoridade protesaun sivíl.
“Intermos de liuhusi projetu ida ita hanaran avaliasaun risku dezastre no SOP’s ba sentru evakuasaun emerjénsia ne’ebé ita rejista ona katak sei implementa ona iha munisipiu Viqueque no Covalima, liuhusi projetu primeiru sira harii sentru evakuasaun iha munisípiu rua ne’e bazeia ba mapamentu risku dezastre nian ne’ebé hatudu katak dadus aas liu entaun projetu ne’e foka liu ba munisípiu rua ne’e”, dehan Sekretáriu Estadu SEPS.
To’o oras ne’e daudaun governu ho parseiru sira harii ona sentru evakuasaun sanulu (10) kompostu husi neen (6) harii iha Aileu, rua (2) iha Ainaro, ida (1) iha Viqueque no ida (1) iha Suai munisípiu Covalima.
Entretantu workshop ne’e hetan partisipasaun husi Sekretáriu Estadu Protesaun Sivíl Domingos Mariano Reis, Prezidente Autoridade Protesaun Sivíl Jesuíno dos Reis de Matos Carvalho, reprezentante husi União Europeia, Sekretaria Estadu Komunikasaun Sosiál (SEKOMS), liña ministeriál sira, inklui parseiru nasionál no internasionál sira.
*
Hakerek Testu : Job
Editora : Ana
