MetroFM/RCL; Polísia Nasionál Timor Leste (PNTL) munisípiu Lautem liuhusi ekipa tránzitu rodoviáriu prende ona motorizada hamutuk haat (4) ne’ebé ema deskoñesidu subar iha aldeia Motara, suku Bauro, postu administrativu Lospalos, munisípiu Lautem.
Komandante PNTL munisípiu Lautem Superintendente João da Costa hateten, ligadu ho akontesimentu motorizada lakon iha munisípiu Lautem, daudaun ne’e asegura ona iha komando PNTL munisípiu refere.
“Kona-ba motorizada komunidade nian ne’ebé lakon iha munisípiu Lautem ne’e parte polísia hetan informasaun husi fontes balun no polísia buka tuir to’o hetan motor iha aldeia Motara suku Bauro no motor tolu ne’e rai iha to’os, dadaun ne’e asegura ona iha komando PNTL munisípiu Lautem”, hateten komandante PNTL munisípiu Lautem Superintendente João da Costa, iha nia knaar fatin Lautem, foin lalais ne’e.
João da Costa mós afirma, rezultadu prosesu identifikasaun parte PNTL konsidera motorizada hirak ne’e na’ok tanba, suspeitu sira la aprezenta dokumentu legál sira ba motor sira refere no polísia asegura ona hodi prosesa tuir Lei.
“Iha prosesu identifikasaun ba motor tolu durante loron rua ne’e, parte PNTL konsidera motor hirak ne’e na’ok tanba suspeitu sira la aprezenta dokumentus legais, tanba nee motorizada refere polísia asegura ona hodi prosesa tuir Lei”, afirma João da Costa
Relasiona ho akontesimentu ne’e, superintendente João da Costa husu ba komunidade sira ne’ebé motor lakon bele lori dokumentu legál motor nian, nune’e bele foti fali sira-nia motor.
“Komunidade ne’ebé nia motor lakon bele lori motor nia dokumentus mai tuir númeru ne’ebé iha tuir númeru sasis nian no STNK, wainhira apar ho motor ne’e bele entrega ba nia na’in”, dehan João.
Iha sorin seluk diretór servisu munisipál transporte terestre Lautem Eddy Correa de Lemos mós heteten, servisu munisipál sempre servisu hamutuk ho polísia liu-liu ekipa tránzitu nian no simu ona keixa husi vítima no blokei ona dokumentu motor ne’ebé lakon iha munisípiu Lautem.
“Kona-ba motor lakon diresaun munispál simu keixa hamutuk nain haat (4), tinan kotuk nain ida (1), entre motor 4 ne’e ida entrega ona ba nia na’in, falta na’in tolu ne’e mak ita sei servisu hamutuk ho polísia hodi buka tuir no sira hato’o keixa uluk iha polísia lori deklarasaun motor lakon nian mai iha ne’e ami blok ona motor nee nia dokumentus iha sistema”, relata Eddy.
Entertantu, motorizada hamutuk 4 ne’ebé dadaun ne’e PNTL munisípiu Lautem asegura, kompostu husi motor ho marka mio hamutuk tolu (3) ho xapa matríkula Y. 6614, S. 0399, H. 5776 inklui motor ho marka vixion ho xapa matríkula I. 6991, enkuantu motor ho marka mio hamutuk 3 ne’e lakon iha fulan juñu tinan ne’e no motor ho marka vixion lakon iha tinan 2018.
*
Hakerek na’in: Nito Soares/Elidio
Editora : Ana
