MetroFM-Atauro; Banco Central de Timor-Leste (BCTL) hala’o diseminasaun informasaun ba komunidade autoridade administrativa Atauro, oinsá atu komprende di’ak ba sistema no nia benefísiu sira husi pagamentu dijitál.
Liuhusi reportajen husi jornalista rádiu komunidade Manu Koko Atauro Angelica Paicheco ba programa Metro Ohin Loron iha rádiu MetroFm, kuarta feira (30/07/2025) ne’e, diretór ezekutivu sevisu bankária no sistema pagamentu BCTL Andre da Costa hateten, programa deziminasaun ne’e hanesan programa ida hodi hasa’e koñesimentu komunidade sira iha sistema pagamentu dijitál .
“Ohin banku sentrál servisu hamutuk ho prezidente autoridade administrativa Atauro realiza programa ida ho naran programa diseminasaun informasaun kona-ba pagamentu dijitál, objetivu ida maka komunidade sira hatene benefísiu sira kona-ba pagamentu dijitál ne’e, segundu maka aumenta koñesimentu no konfiansa ba sosiedade, funsionáriu públiku no komunidade sira hotu, terseiru maka enkoraja membru kooperativa sira juventude feto no empregadora hodi adapta ho pagamentu dijitál, programa ne’e mós alina ho programa nonu governu nian kona-ba dezenvolvimentu ekonomia dijitál”, hateten diretór ezekutivu BCTL.
Diretór ne’e mós afirma, iha ligasaun ho Asosiasaun ba Nasaun Sudeste Aziátiku (ASEAN), banku sentrál apoiu Timor Leste atu adere ba ASEAN liuhusi sistema modernizasaun sistema pagamentu dijitál no programa ne’e atu reduz kustu ba operasional banku sentrál no banku komersiál sira.
“Objetivu ikus ba progama ne’e oinsá prevene jestaun osan aat, brankamentu kapitais no prevene sirkulasaun moras da’et sira, nune’e BCTL konvida autoridade hotu kompostu husi komunidade baibain, banku sira hanesan BNCTL, BNU no ANZ no empreza sira atu mai aprezenta mós sira nia pagamentu dijitál sira ne’ebé desponível ona iha Timor”, dehan Andre.
Entretantu, atividade diseminasaun ne’e hala’o ohin (kuarta feira) no diretór ne’e husu nafatin ba entidade hotu atu hato’o pergunta durante diseminasaun informasaun ba sistema pagamentu dijitalizasaun ne’e atu nune’e BCTL bele esplika klaru ba ema hotu hodi komprende di’ak sistema ne’e rasik.
*
Hakerek testu : Angel / Elidio
Editora : Ana
