MetroFM : Sekretária Estadu ba Igualdade (SEI) Elvina Sousa Carvalho konsidera funsionáriu barak seidauk hatene kanta hino nasionál Pátria-Pátria no marsa funsaun públika tamba funsionáriu barak kanta la hó sira nia vontade tomak no balun la kanta no hamri’ik de’it wainhira bandeira nasional hasa’e kada primeria semana.
Governante hato’o lia hirak ne’e wainhira sai inspetór serimónia iha isar bandeira nasionál iha resintu palásiu governu segunda-feira (04/08/2025) ne’e.
“Serimónia isar da bandeira wainhira ita kanta Pátria-Pátria wainhira ita kanta marsa ba iha funsaun públiku funsionáriu barak mak kontinua la kanta ho semangat, ha’u fiar katak barak mós la dekór hanesan mós inspetór da serimónia isar bandera ida wainhira ita kanta hino nasionál ita kanta ho fuan ho laran tamba ne’e ita nia identidade inklui mós marsa funsaun públiku husu atu funsionáriu sira kanta ho vontade no iha espíritu ida maka’as”, dehan Elvina Sousa.
Elvina Sousa hatutan tan katak iha fulan Agostu Timor-Leste sei selebra loron nasionál rua, loron FALINTIL no loron 30 Agostu Konsulta populár, Selebrasaun loron nasionál iha fulan Agostu hanesan mai hafanun ema hotu nia espíritu nasionalismu, hodi servi nasaun Timor-Leste.
Iha serimonia ne’e partisipa husi Sekretáriu Estado Komunikasaun Sosiál, Sekrerária Estadu Igualdade, Prezidente funsaun públiku, Xefe Gabinete, Diretór jerál, assesór kargu xefia sira no PNTL, F-FDTL inklui funsionáriu sira.
*
Hakerek testu : Luis
