METRO FM/RADIO BUCOLI: Inan feton sira ne’ebe faan sasán produtu lokál iha estrada ninin diresaun Baucau Dili husu atu governu hari’i fatin dignu ba sira hodi troka tiha baraka sira ne’ebé sira halo rasik ho liman nune’e bele garantia mós ijiene no sira bele faan ho konfortável.
Tuir reportazem Jornalísta Rádio Komunidade Bucoli Jaly Silva hato’o mai programa Metro Loron Ohin, kinta – feira (07/08/2025) ne’e iha área Aubaka suku Bucoli Postu Administrativu Baucau Villa katak komunidade barak faan iha estrada ninin presija mós governu halo fatin dignu hodi nune’e sira mós bele faan sasán.
Iha intervista ne’e vendedores Zeferina Joana da Costa hateten katak durante sira faan sasán iha dalan ninin diresaun Baucau Dili sira iha rendimentu di’ak maibé fatin ba sira ladun di’ak tamba ne’e sira husu atu governu hari’i fatin ba sira.
“husu ba governu atu hari’i ami nia fatin dignu iha estrada ninin ne’e hodi ami faan sasán, agora daudaun faan iha hadak leten ne’ebe ami rasik mak halo nune’e ami husu atu hadia nune’e bele faan produtu lokál sira, sasán ne’ebé faan iha ne’e mak hanesan, fehuk talas, ai fuan sasán sira ne’e ami hola fali iha merkadu no mai faan fali iha ne’e, kada loron ami iha rendimentu di’ak no dalaruma mós la di’ak ne’e depende fali ba ema hola”, dehan Zeferina.
Vendedores Zeferina Joana da Costa husu mós atu feto maluk sira tenke servisu buka osan rasik hanesan saida mak agora nia halo hodi sustenta oan no família sira.
Entretantu kompradór sira maioria husi ema sira ne’ebé halo viagen husi Dili bá Baucau, Lautem Viqueque ne’ebe sempre hola produtu hirak ne’ebe faan iha área Bucoli nian.
*
Hakerek testu : Jaly/Elidio
