MetroFM/RCB; Komemorasaun loron FALINTIL ba tinan ida ne’e selebra ba dala limanulu (50) la’ós de’it halo reflesaun ba tempu funu, maibé atu hafoun faktu valór iha futuru.
“Ohin selebra aniversáriu kria FALINTIL ba dala 50, ne’ebé sei selebra formalmente iha loron 20 agostu tinan ida ne’e, ita halibur malu la’ós de’it atu reflete pasadu ne’ebé funu, maibé atu hafoun faktu valór sira ne’ebé ho sentidu ba ita-nia prezente no trasa lala’ok ba ita-nia futuru, loron ohin apela ba memória ba gratidaun no responsabilidade, memória ba sira ne’ebé luta no lakon iha funu laran, gratidaun ba sira ne’ebé prejistu responsabilidade ba jerasaun sira ne’ebé sei simu eransa ba nasaun ne’ebé ita harii ohin loron”, mensajen ne’e hato’o husi Xefe Estadu Majór FALINTIL-Forsa Defeza Timor-Leste (F-FDTL) Tenente Jenerál Falur Rate Laek, ne’ebé reprezenta husi Xefe Gabinete husi Xefe Estadu Majór jenerál F-FDTL Marcelino Ximenes “RIZAI”, iha resintu autoridade munisípiu Baucau, Segunda feira (18/08/2025).
Nia mós afirma iha kontestu auto determinasaun FRETILIN mosu nu’udar forsa polítiku no xave ba buka ukun rasik-an, iha presaun no konflitu koloniál nia leet.
Fatin hanesan Ministra Solidariedade Sosiál no Inkluzaun (MSSI) Verónica das Dores nu’udar inspetora ba serimónia ne’e hateten, komemorasaun ne’e importante ba povu tomak jerasaun foun.
“Loron ohin ne’e loron importante ba povu Timor-Leste ba istória ne’ebé mak ita labele haluha ba jerasaun foun sira katak 20 de agostu ne’e loron importante ba FALINTIL katak FALINTIL mak luta, sira mak asua’in no liman kro’at povu nian, husi momentu ne’ebá sira luta to’o ita hetan ukun rasik-an”, dehan ministra MSSI.
Iha tempu hanesan prezidente konsellu veteranu munisípiu Baucau Fernando Gusmão “Beredu’u” husu governu atu kada tinan selebra loron FALINTIL nian.
“Kada tinan tenke selebra hanesan ne’e, agora nonu governu fó ona ezemplu, governu tuirmai mós tenke hanesan ne’e”, hateten Berdu’u.
Partisipa iha komemorasaun ne’e, Prezidente Autoridade Munisípiu Baucau, Vise Ministru Saúde, Komandante PNTL Baucau, F-FDTL, veteranu sira, relijiozu sira, konvidadu no komunidade sira.
*
Hakerek testu : Jally/ Elidio
Editora : Ana
