MetroFM: Komunidade no autoridade postu administrativu Turiscai munisípiu Manufahi, realiza desportu komunitáriu hodi komemora loron konsulta populár.
Xefe komisaun organizadora Antoninho Ferreira hateten, dadaun ne’e hala’o hela preparasaun abertura ba jogu desportu komunitáriu hodi komemora loron konsulta populár.
“Oras ne’e dadaun iha postu Turiscai ita halo hela preparasaun ba komemorasaun loron 30 de agostu ninian no oras ne’e dadaun hamutuk ho komisaun sira atu realiza ka abertura ba jogu ne’ebé iha modalidade sira ne’ebé mak ita atu abertura mak futsal ba feto no mane, volley ba feto no mane no iha mós jogu tradisionál joga talik”, dehan Antoninho liuhusi reportajen rádiu komunidade Proklamadór Turiscai mai rádiu MetroFM iha programa Metro Ohin Loron, kinta feira (21/08/2025) ne’e.
Komisaun organizadora ne’e mós afirma, jogu ba loron importante ne’e hetan apoiu másimu husi Ministériu Juventude Desportu Arte no Kultura (MJDAK) ho montante orsamentu hamutuk dolar amerikanu rihun tolu (3000) ba atividade ne’e.
Entretantu partisipante ne’ebé partisipa iha jogu komunitáriu ne’e mai husi suku sanulu resin ida (11) iha postu administrativu Turiscai nian inklui eskola rua mak hanesan eskola sekundáriu katólika no públiku.
*
Hakerek testu : Herminia
Editora : Ana
