MetroFM/ME; Ministériu Edukasaun liuhosi Diresaun Nasionál Inkluzaun Asaun Sosiál Eskolár no Diresaun Nasionál Planu, Orsamentu no Estatístika kontinua sensibiliza kona-ba matéria violénsia bazeia ba jéneru ba estudante sira iha eskola 4 de Setembro UNAMET Balide, sexta-feira (22/08/2025) ne’e.
Hafoin remata abertura ba sensibilizasaun Diretór Nasionál Inkluzaun Asaun Sosiál Eskolár (DNIASE) Fernando Soares hateten, objetivu husi sensibilizasaun ne’e atu partilla matéria ba estudante no mestre sira hodi fó koñesimentu ne’ebé mak di’ak hodi respeita malu bainhira tuir prosesu ensinu aprendizajen insentivu no kualidade ho inkluzivu.
“Atividade sensibilizasaun ne’e hodi promove kualidade feto iha karreira profesionál ho nune’e feto sira bele sai feto ida ne’ebé mak potensiál iha grupu, komunidade ka instituisaun sira atu nune’e bele halo separasaun jéneru feto iha karreira profesionál”, dehan diretór DNIASE.
Diretór ne’e argumenta, sensibilizasaun ne’e sei halo kontinuasaun ba to’o iha munisípiu sira no halo ona iha munisípiu sanulu resin tolu (13), maibé la’ós ba eskola sira hotu, enkuantu kada munisípiu sei hetan sensibilizasaun ba eskola ida.
Dirijente ne’e mós husu partisipasaun másimu ba estudante sira nune’e aprende didi’ak asuntu jéneru nian, hodi sira respeita malu iha eskola, entre estudante sira no respeita manorin-na’in sira.
*
Média : ME
