MetroFM/ RCLM ; Komandu Polísia Nasionál Timor Leste (PNTL) munisípiu Baucau realiza jogu femininu ba eskola sekundáriu sira iha munisípiu ne’e ho objetivu hodi hametin paz no estabilidade iha munisípiu refere.
Reprezentatne komandu PNTL munisípiu Baucau superintendente Arquimino Ramos hateten, komandu halo atividade ne’e hodi fó oportunidade ba feto sira oinsá dezenvolve sira-nia talentu.
“Jogu ne’e loke ba feto sira de’it tamba atividade jogu barak loke ba mane sira de’it tamba ne’e PNTL fó prioridade ba feto sira iha nível sekundáriu hodi aumenta sira-nia talentu iha área futsal nian, husu nafatin ba joven sira hatudu nafatin talentu ne’ebé di’ak kria amizade to’o jogu ne’e remata”, dehan Arquimino.
Reprezentante estudante feminina nível sekundáriu husi eskola sekundáriu Santo António (ESSA) Baucau Dalia Dias Freitas Belo afirma, kontente ho atividade ne’ebé PNTL munisípiu Baucau realiza ba estudante sira.
“PNTL munisípiu Baucau loke jogu salaun ba feto sira agradese tebes ba komandu PNTL bele hakle’an koñesimentu futsal nian ba ami, nune’e bele iha mentalidade ba jogu futsal, husu mós atu komandu PNTL kontinua loke jogu sira ne’e ba eskola sira fó oportunidade atu nune’e bele iha koñesimentu ba jogu femininu ne’e”, tenik Dalia.
Atividade jogu ne’e realiza ona iha segunda feira (25/08/2025), hala’o iha kampu batallaun ordem públiku (BOP) munisípiu Baucau no partisipa husi eskola sia (9) iha jogu ne’e, kompostu husi eskola Cafe Baucau, ESSA Teulale, eskola sekundáriu jerál (ESG) Venilale no seluk tan.
Entretantu manan na’in ba kompetisaun ne’ebé hetan primeiru lugar sei hetan osan montante dolar amerikanu atus lima ($500), segundu lugar dolar amerikanu atus tolu ($300), terseiru lugar sei hetan osan dolar amerikanu atus rua ($200) no hetan apoiu fundus husi parseiru The Asia Foundation.
*
Hakerek testu : Castro/Floriano
Editora : Ana
