MetroFM; Funsionáriu no ajente adminsitrasaun públiku partisipa hasa’e ka içar bandeira nasionál semana dahuluk ba fulan setembru tinan 2025 iha palásiu governu, Díli, segunda feira (01/09/2025) ne’e.
Inspetór ba serimónia hasa’e bandeira ne’e Primeiru Ministru (PM), Kay Rala Xanana Gusmão hateten, gasta osan povu nian ho fuan tanba osan ne’e povu nian sosa ho ran no ruin,
“Favór ida uza osan ho di’ak la gasta, la’os atu prova de’it dehan ita iha noventa pursentu gasta arbiru de’it labele, tuir regras ho didi’ak tanba osan ne’e povu nian, sira be mate ne’e mak sosa ho ran, sosa ho ruin ne’ebé lakon tiha ona, sosa ho isin lolon, nune’e fó lembra de’it”, hateten PM Xanana.
Xefe governu ne’e haktuir Bayu Undan taka tiha ona no prosesu dezenvolvimentu Greater Sunrise la’o hela tanba povu sira mak mate hodi sosa osan ne’e.
“Mina matan bayu undan taka tiha ona, balu hakilar ona, tau osan barak ba Greater Sunrise bainhira mak mai los, lalika liga ba liafuan aat sira ne’e, liga ba liafuan ne’ebé ita-nia komprimisiu ba eroi sira ne’ebé mate, eroi sira mak sosa osan ne’ebé ita uza hodi dezenvolve ita-nia rain, liu-liu hodi kria kondisoens ba povu nia moris di’ak”, dehan Xanana.
Ikus liu PM Xanana mós husu ba membru governu sira atu jere osan povu nian ho di’ak.
Iha serimónia ne’e hetan partisipa hosi Primeiru Ministru (PM), Kay Rala Xanana Gusmão, vise Primeiru Ministru, ministru Dezenvolvimentu Rurál no Abitasaun Komunitária Mariano ‘Assanami’ Sabino, Sekretáriu Estadu Komunikasaun Sosiál Expedito ‘Loro’ Dias Ximenes, Prezidente Funsaun Públika, Prezidente CHEGA.IP, xefe gabinete, diretór jerál, asesór sira, kargu xefia, F-FDTL, PNTL, Funsionáriu sira no média nasionál.
*
Hakerek testu: Luis Lopes
Editora : Ana
