Metro FM/ RKM: Diresaun Nacional Transportes no Terrestres, DNTT, Bobonaro, kontribui reseita ba Estadu ho montante liu hosi 203 mil dólares, liuhosi atividade inspesaun no kontrolu ba veíkulu sira ne’ebé uza estrada públika. Atividade inspesaun rodoviária ne’e hala’o ho objetivu atu asegura katak veíkulu sira ne’ebé hala’o atividade iha estrada públika kumpre regra tráfiku no padraun seguransa rodoviária.

Diretora Interina DNTT Bobonaro, Ermelinda Epolita Barreto Maia hateten ba Rádio Maliana, iha 23 Setembru 2026, katak servisu prinsipal DNTT inklui atendimentu ba transporte públiku no privadu, liuliu iha área inspeksaun no kontrolu veíkulu.

Nia hateten katak, kada semana, ekipa DNTT servisu hamutuk ho Polísia Tránzitu Maliana hodi hala’o atividade auto stop iha Merkadu Maliana no fatin seluk, atu halo verifikasaun ba veíkulu sira ne’ebé uza estrada públika. Husi atividade inspeksaun ba veíkulu ne’ebé hala’o durante fulan Janeiru to’o Agostu tinan 2026, DNTT Bobonaro halo estimasaun inspeksaun ba veíkulu hamutuk 120, ho reseita total 203 mil, 730 dólares no 50 sentavus. husi reseitas ne’ebe maka kontribui barak liu maka  aktividade inspekasaun ba veikulo ho orsamentu 180 mil 464 dolar. representa kontribuisaun husi atividade servisu DNTT iha area transporte no inspeksaun rodaviariu.

DNTT Bobonaro kontinua enkoraja proprietáriu no utilizadór veíkulu sira atu kumpre obrigasaun legal, inklui asegura katak veíkulu sira iha kondisaun di’ak no dokumentasaun kompletu antes uza estrada públika.

Liuhosi prosesu inspeksaun, DNTT halo verifikasaun ba kondisaun físika veíkulu no dokumentasaun relevante, hodi ajuda asegura seguransa ba utilizadór estrada sira no prevene risku acidente iha estrada.

Ho atividade inspeksaun no kontrolu ne’ebé kontinua, DNTT Bobonaro espera bele hametin seguransa rodoviária, aumenta kumprimentu ba regra transporte no, iha tempu hanesan, kontribui ba aumentu reseita Estadu. (Job)