Metrofm/ili wai; Projetu Programa Nasional Dezenvolvimentu Suku (PNDS) iha Suku Sau, Postu Administrativu Manatuto, Munisípiu Manatuto, finaliza ona nia implementasaun iha tinan 2026, ho orsamentu hamutuk liu dolar Amerikanu 30 mil.

Ekipa responsavel implementasaun PNDS iha Suku Sau, João Simão Soares, hateten iha loron 22, setebro, 2026,  katak projeto ne’e implementa ona ho progresu 100 porsentu, tuir orsamentu hamutuk 30 mil, 877 dolar no 80 sentavus, orsamentu ne’e uza hodi implementa infraestrutura valeta ho naruk 300 metro, ne’ebé fahe ba pakote rua, maski iha orsamentu ida de’it,orsamentu projeto fahe ba kategoria tolu, inklui material konstrusaun, material lokal no pagamentu ba traballadór.

Ba implementasaun obra, ekipa PNDS halo prosesu selesaun ba kompanhia sira liuhusi konkursu. kompanhia ne’ebé oferese orsamentu tuir kondisaun no ho kustu ne’ebé apropriadu mak sei hetan kontratu atu implementa obra. ekipa responsavel  hateten katak pagamentu ba traballadór, liuliu badaen sira, hala’o tuir progresu obra. pagamentu hahú ho 50 porsentu no kompleta to’o 100 porsentu bainhira obra finaliza hotu.

PNDS mak programa ne’ebé permite komunidade iha suku atu determina diretamente projetu ne’ebé konsidera hanesan prioridade ba sira nia nesesidade moris no melhora diak liu tan infrastrura iha komunidade suku sau.

Iha Suku Sau, komunidade fahe ba aldeia rua, mak Aldeia Obrato no Aldeia Sau. komunidade husi aldeia rua ne’e aprezenta proposta no programa ida-idak ba iha suku. depois, ekipa PNDS analiza no determina prioridade tuir nesesidade komunidade. antes implementa projetu, ekipa pnds halo observasaun diretamente iha terrenu atu haree kondisaun no nesesidade existente. projetu valeta sai prioridade tanba durante tempu udan, bee halai sae no komunidade enfrenta dificuldade tanba bee la iha dalan drenajen ne’ebé apropriadu. ba tinan 2027, projetu ne’ebé sei implementa sei depende ba planu no prioridade ne’ebé komunidade husi aldeia rua sei determina, dehan ekipa responsabilidade.

Tempu hanesan sefe Suku Sau, Barbara Gama Soares, fó apresiasaun ba programa PNDS tanba, tuir nia, programa ne’e fó benefísiu direta ba komunidade. projetu pnds la’ós deit mai diretamente husi suku, maibé prioridade mai husi aldeia sira no komunidade mak aprezenta sira nia nesesidade. durante tinan 2026, pnds implementa projetu drenajen iha aldeia obrato. iha tempu hanesan, infraestrutura seluk ne’ebé iha kondisaun aat mos hetan hadi’a, inklui irigasaun ne’ebé aat no konstrusaun ho betón no muro iha eskola.

Implementasaun pnds fó benefísiu ba komunidade, liuliu iha infraestrutura básika. Ba tinan oin mai, nia hateten komunidade sei fó prioridade ba hadi’a estrada iha laran suku, tanba durante tempu udan, kondisaun estrada aat bele difikulta movimentu komunidade.

Barbara Gama Soares mos apresia maneira ekipa PNDS jere orsamentu no implementa projetu iha suku sau. nia hateten katak traballadór, liuliu badaen sira, satisfás ho oportunidade servisu ne’ebé programa ne’e fó. nia mos informa katak iha restu orsamentu hamutuk dolar 7 mil, ne’ebé planeadu atu uza ba alargamentu iha área sede Suku Sau.

Iha nia rekomendasaun ba governu, sefe suku sau husu atu programa PNDS kontinua iha tinan sira oin mai, tanba programa ne’e la’ós deit hadi’a infraestrutura, maibé mos kria oportunidade servisu ba komunidade no ajuda hadi’a sira nia moris. (Job)