Dili: Sekretaria Estadu Komunikasaun Sosiál (SEKOMS), halo avaliasaun dezempeñu ba funsionáriu kazuál sira hamutuk atus ida haatnulu (140), iha salaun Sekretaria Estadu Igualdade (SEI) Maria Gorrete Obrigado Barak, kinta feira (26/06/2025).
Sekretáriu Estadu Komunikasaun Sosiál Expedito “Loro” Dias Ximenes informa, ba funsionáriu kazuál sira tenke rai segredu, onestidade no lealidade ba estadu iha servisu fatin.
“Ohin halo enkontru ho funsionáriu kazuais iha hamutuk 140 iha diresaun haat (4), objetivu husi enkontru ne’e atu esplika ba sira kona-ba polítika governu da-sia durante servisu tinan rua nia laran, aproveita agradese mós ba sira, durante tinan ida sira servisu hanesan, funsionáriu kazauis kontratadu iha Sekretaria Estadu Komunikasaun Sosiál, nomós rona sira-nia preokupasaun no difikuldade durante tinan ida sira servisu, tanba loron 30 fulan juñu sira-nia kontratu hotu ona, molok sira asina fali kontratu ha’u halo avaliasaun dezempeñu
ba sira, tuir relatóriu sira ne’ebé diretór sira fó mai ha’u, esplika ba sira pozisaun tolu sira hanesan funsionáriu kontratadu, ida rai segredu servisu estudu nian, rua servisu ho onestidade no lealidade ba estadu no governu”, katak Expedito.
Governante ne’e hatutan, funsionáriu kazuál sira hato’o sira-nia prontidaun ho servisu nafatin iha polítika governu da-sia nian, liu-liu iha área komunikasaun sosiál nian, nomós husu ba diretór sira tenke halo avaliasaun kada semana ba funsionáriu kazuál sira.
Sekretáriu Estadu ne’e mós husu ba funsionáriu kazuál sira mak laiha dezempeñu di’ak no servisu la di’ak tenke hapara kontratu.
“Bainhira sira-nia dezempeñu di’ak, disiplina di’ak, produtividade iha servisu bele kontinua servisu hanesan funsionáriu kontratadu, maibé se bainhira avaliasaun dezempeñu la’o la dia’k, tama servisu la tuir oras, produtividade la iha, lealidade laiha, laiha segredu servisu, laiha onestidade iha servisu fatin, bele hapara ona sira nia kontratu” tenik nia.
Partisipa iha avaliasaun dezempeñu ne’e mak hanesan, xefe gabinete SEKOMS, diretór jerál, no diretór nasionál no xefe departamentu sira, funsionáriu kazuál sira SEKOMS nian, inklui média nasionál.
Hakerek testu : Luis Lopes
Editora : Ana
