MANATUTO — Asosiasaun Interese Sosiedade TAES iha Munisípiu Manatuto kontinua hala’o esforsu atu promove protesaun no konservasaun ambiente tasi, liuhusi programa sensibilizasaun no edukasaun ba estudante, manorin no komunidade.

Diretór Ezekutivu TAES Cipriano Soares hatete katak protesaun ambiente tasi importante tebes, tanba tasi sai fonte moris no sustenta atividade ekonomia komunidade barak iha área costeira.

“Programa ida-ne’e importante tebes, tanba tasi hanesan fatin ida ne’ebé fó moris ba ita-nia komunidade. Tanba ne’e, ita presiza proteje no kuidadu ambiente tasi,” dehan Cipriano wainhira hala’o intevista ho Jornalista Radio Komunidade Iliwai Manatuto iha nia knaar fatin tersa feira (08/0926) ne’e.

Programa protesaun ambiente tasi ne’e hala’o liuhusi parseria entre TAES no PENSI iha rejiaun ASEAN, no servisu hamutuk ho Ministériu Agrikultura, liuhusi Direksaun Peskas, no mos servisu hamutuk ho servisu munisipál sira ne’ebé iha responsabilidade ba bee, saneamentu no ambiente.

Atividade sensibilizasaun ne’e inklui partilla informasaun no hasa’e konhesimentu kona-ba importância protesaun ambiente tasi ba estudante, komunidade no manorin, atu nune’e sira bele komprende no partisipa diretamente iha kuidadu ambiente tasi.

Atividade ne’e hala’o ona iha Eskola Sekundária Tékniku Vokasional Manatuto no iha estudante sira iha Eskola Kafé. Tuir planu programa, sensibilizasaun sei kontinua iha Eskola Sekundária Santo António Manatuto, no mos iha komunidade Suku Maabat no Suku Sau.

Diretór Ezekutivu TAES esplika katak estudante sira sai alvu importante iha programa ne’e tanba sira iha potensial atu aprende no fahe informasaun ba membru família, inan-aman no kolega sira.

“Estudante sira mak pilar importante no produtivu tanba sira iha kapasidade no konhesimentu ne’ebé kle’an. Tanba ne’e, ita hili estudante sira atu sai alvu hodi fahe informasaun ba inan-aman no kolega sira kona-ba protesaun ambiente tasi, atu nune’e ema hotu bele iha sentimentu pertense ba kuidadu ambiente tasi.”, nia dehan

TAES hanesan organizasaun sosiedade sivíl mos konsidera governu nu’udar parseiru estratéjiku iha esforsu atu proteje ambiente. Organizasaun ne’e kontinua servisu hamutuk ho Ministériu Agrikultura, liuhusi Direksaun Peskas, no entidade relevante sira iha área ambiente.

Diretór TAES afirma katak organizasaun sosiedade sivíl iha responsabilidade atu apoia no tulun governu iha implementasaun atividade sira ne’ebé presiza hala’o iha komunidade. (Tito)