MetroFM/RCLIL; Inan faluk Lita Soares, moris ho kbiit limitadu no hela mesak iha Aldeia Laramet, Suku Fatuk Makerek, Postu Administrativu Laklubar, Munisípiu Manatuto, hasoru difikuldade moris loron-loron, liuliu tanba nia kondisaun saúde no falta ema ne’ebé bele tau matan ba nia.

Jornalista Rádio Lian Idate Laklubar, Altino do Espírito Santo, hato’o reportagem direta ba programa Metro ohin loron, 21 Agostu 2026, kona-ba situasaun moris inan faluk Lita Soares ne’ebé enfrenta difikuldade boot iha nia moris loron-loron.

Tuir dadus jornalista ne’e, Lita Soares hela iha uma ki’ik ida ne’ebé kondisaun la di’ak, ho kalen ne’ebé kleur ona no iha kondisaun ne’ebé bele monu. Uma ne’e sai mahon ba nia atu moris no proteje an hosi kondisaun klima.

Lita Soares nia la’en mate ona no husik nia mesak. Inan faluk ne’e la iha oan ida ne’ebé bele hela besik ho nia atu tau matan no ajuda nia iha nesesidade loron-loron. Tanba idade ne’ebé avansadu, Lita Soares tenke hasoru realidade moris ne’ebé todan.

Problema ida ne’ebé aumenta liután nia difikuldade mak kondisaun saúde. Tuir dadus ne’ebe jornalsita nee hetan, inan faluk ne’e sofre moras iha ain, ne’ebé halo nia difisil atu lao no halo atividade sira hanesan uluk.

Kondisaun saúde ne’e mós halo nia lakon forsa atu servisu no buka osan atu sustenta nia moris loron-loron. Tanba ne’e, obriga nia tenke hela iha uma no la bele halo servisu hanesan uluk.

Maski enfrenta situasaun ne’ebé difisil, Lita Soares hetan atensaun hosi família no viziñu sira. Tuir informasaun ne’ebé hetan, bainhira nia hasoru difikuldade, família no viziñu sira tau matan ba nia no ajuda tuir sira nia kapasidade.

Situasaun inan faluk Lita Soares nian hatudu mós nesesidade atu ema vulnerável, liuliu ema katuas no inan faluk ne’ebé moris mesak, hetan atensaun no apoiu apropriadu hosi família, komunidade no entidade relevante.

Inan faluk lita soares simu hela osan idosos maibe la sufsente ba inan nee hodi hare nia moris tamba kondisaun saude ne’ebe inan ne’e iha.

To’o notísia ida-ne’e hatún, situasaun kona-ba inan faluk Lita Soares seidauk hetan konfirmasaun ofisiál hosi autoridade kompetente, no seidauk iha informasaun kona-ba apoiu ka asisténsia ne’ebé nia hetan hosi entidade relevante. Metro FM sei kontinua halo verifikasaun ba informasaun ne’e. (Job/Altino)