MetroFM; Sorumutu Konsellu Ministru kuarta feira ne’e (30/07/2025) Aprova projetu Dekretu-Lei ne’ebé kria Banku Nasionál Dezenvolvimentu Timor-Leste, SA (BNDTL), ne’ebé aprezenta hamutuk hosi Gabinetes Ministrus Planeamentu no Planeamentu Estratéjiku, Ministra Finansas no Vise-Primeiru Ministru no Ministru Koordenadór Asuntus Ekonómikus.

BNDTL hanesan instituisaun finanseira ida ho kapitál públikus ne’ebé esklusivu, ho personalidade jurídika no autonomia administrativa, finanseira no patrimoniál, ne’ebé nia objetivu atu apoia investimentu produtivu no hasa’e kreximentu ekonómiku sustentavel país nian.

Tuir diploma ne’ebé daudaun ne’e aprova, BNDTL iha misaun atu kompleta falla merkadu nian iha asesu ba finansiamentu médiu no tempu naruk, promove solusaun adekuada ba nesesidade komunidade emprezariál timoroan, liuliu iha setór ne’ebé konsidera estratéjiku, hanesan agrikultura, indústria transformadora, turizmu, infraesruturas no servisu sosiál sira. Banku ne’e bele mós hala’o funsaun iha jestaun fundus estratéjikus, tuir mandatu Governu nian, nune’e asegura ninia sustentabilidade iha futuru no neutralidade orsamentál.

Diploma ne’e estabelese mós katak kapitál sosiál inisiál ne’ebé fiksa iha dolar amerikanu millaun 30, ne’ebé Estadu maka subskreve tomak.

Entretantu Konsellu Ministru mos aprezenta projetu delibarasaun hosi Ministru Obras Públikas, Samuel Marçal, Konsellu Ministrus atu autoriza despeza no abertura ba ninia prosedimentus aprovizionamentu hodi halo ezekusaun ba projetu reabilitasaun infraestruturas rodoviárias haat.

Reabilitasaun ba Estrada Nasionál, iha seksaun entre kruzamentu Lourba (Bobonaru), Atsabe no kruzamentu Letefoho (Ermera), ho naruk 48,93 km no kustu ne’ebé prevee dolar millaun 47,9, Reabilitasaun ba Estrada Nasionál, iha seksaun entre Maliana, Kailaku no Ponte Marobo (Munisípiu Bobonaru), ho naruk 26 km no kustu ne’ebé prevee dolar millaun 25,6, Reabilitasaun Estrada Munisipál, iha seksaun entre kruzamentu Bobonaru no Lolotoe Vila, ho naruk 8,9 km no kustu ne’ebé prevee dolar millaun 13,8, Reabilitasaun ba Estrada Urbana Likisá, ho naruk 20 km no kustu ne’ebé prevee dolar millaun 19,8.

Governu mós fó instrusaun ba Komisaun Nasionál Aprovizionamentu hodi hahú etapa sira tuirmai hosi prosedimentus kontratasaun públika nian, tuir lejizlasaun ne’ebé vigora.

*

Fontes ba informasaun ne’e hosi Portal Governu : Sorumutu Konsellu Ministrus nian iha loron 30 fulan-jullu tinan 2025