METRO FM: Governu Da-sia Konstitusionál liu husi Sekretaria Estadu Komunikasaun Sosial (SEKOMS), fó apoiu formasaun jurnalizmu báziku durante loron lima (5) ba estrutura konsellu suku no joventude suku Bidau Akadiruhun, postu Administativu Nain Feto-Dili.
Iha abertura formasaun Segunda feira (04/05/26) ne’e Diretor Jerál Komunikasaun Sosiál, Florindo da Costa hateten objetivu prinsipal formasaun ne’e hodi responde ba mudansa teknolójia ne’ebé la’o hela, nune’e Governu promete atu apoiu nafatin suku sira ho formasaun jurnalizmu báziku ba Joventude no membru kosellu suku sira hodi asegura plataforma dijitál ba suku ne’ebé hanaran SUKU DIJITÁL hodi fasilita komunidade sira bele asesu informasaun konaba atividade sira iha suku laran.
“ita iha situasaun ohin loron hakarak ka lakohi,ita iha avansadu teknolojia ohin loron ita mos presija avansa ba oin, la’os hateke ba kotuk, uluk buat hotu uza manuál, dala ruma liafuan ho liafuan hatete ba malu, dala ruma bele halo, no dala ruma labele halo, no dala ruma hateten liafuan lalos, dadus ne’e imprtante, tanba saida mak suku dijitál ne’e importante, importante tanba imi tenke iha koñesimentu kona-ba servisu elektroniku, tanba elektroniku ne’e liga ho internet liu liu informasaun bazika sira iha suku no aldeia”, dehan Diretur Ezekutivu ne’e.
Nia hatutan, estrutura konsellu suku rasik maka sei jere website ne’ebé Governu liu husi SEKOMS sei entrega ba suku ne’e rasik.
“imi rasik asesu no imi rasik mak kria informasaun ruma iha website ne’ebé iha futuru sei lansa, agora iha faze preparasaun, oinsa hakerek informasaun no oinsa fó sai informasaun, formasaun ne’e hanesan jornalista baziku ida, orsida formador sira sei pasa hela informasaun bázika ba ita bo’ot sira hodi bele hetan koñesimentu kona ba informasaun dijitál suku nian,” tenik Florindo da Costa.
Diretór Jerál mos husu ba formandu sira aproveita tempu ba formasaun ne’e hodi bele aprende ho diak kona ba plataforma dijitál ne’e rasik.
Iha fatin hanesan Xefi suku Akadiruhun Juvinal da Conceição, agradese ba Sekretaria Estadu Komunikasaun Sosiál (SEKOMS), ne’ebé ohin halo abertura fo formasaun iha suku akadiruhun, liga ba Plataforma dijitál nian, ida ne’e importante tebes ba joventude sira no konsellu suku sira.
“husu ba konsellu suku sira mantein formasaun ne’e to’o semana ida, nune’e bele hatene netik informasaun ruma, nomos hatene informasaun oinsa atu utiliza sistema dijitál ne’e no kopera hamutuk ho ita nune’e ita bele utilija sistema dijitál ne’ebé asesu ho internet ho lalais,” afirma lideransa suku ne’e.
Partisipa iha abertura formasaun ne’e, Diretór Jerál SEKOMS Florindo da Costa, Diretór Diresaun Nasionál Dezenvolvimentu Media (DNDM) Adriano Monteiro, no reprezentante Autoridade Munisípiu Dili, reprezentante Autoridade Postu Nain Feto, Ofisiál Polisia Suku Akadiruhun no formandu nain 20 inklui komunidade suku Akadiruhun.*
