METRO FM: Governu Da-sia Konstitusionál liu husi Sekretaria Estadu Komunikasaun Sosial (SEKOMS), fó apoiu formasaun jurnalizmu báziku no jestaun website durante loron lima (5) ba estrutura konsellu suku no joventude suku Poetete Lodudu, Postu Administrativu Ermera, Munisípiu Ermera.
Iha intervensaun Diretór Jerál Komunikasaun Sosiál Florindo da Costa hateten formasaun ba estrutura no joventude suku importante atu hakbiit koñesimentu oinsa bele esplora diak liu potensialidade suku nian liu husi Plataforma dijitál suku nian.
“husu ba imi atu aproveita halo didiak formasaun ne’e, opurtunidade diak, ne’e programa governu nian liu husi SEKOMS atu lori dezenvolvimentu dijitál ne’e ba iha suku sira, tanba sa tenki lansa website ne’e bai mi, maibe molok lansa imi tenki aprende uluk lai, dehan Diretór Jerál ne’e wainhira hala’o abertura formasaun iha sede suku Poetete Lodudu Segunda feira (01/06/2026) ne’e.
Nia hatutan benifisiu husi Plataforma dijitál suku nian maka atu lori suku ba ema hotu atu hatene informasaun saida maka akontese iha suku husi nivel suku ba munisípiu to’o nasionál nomos internasionál.
Iha fatin hanesan Xefe Suku Poetete Lodudu Eurico de Jesus Soares hato’o agradesementu ba Governu da-Sia liu husi Sekretaria Estadu Komunikasaun Sosial (SEKOMS), tanba bele tulun ona suku Poetete Lodudu fasilita formasaun nune’e bele hatene oinsa atu promove produtu suku no informasaun oin-oin iha suku ne’e.
“hakarak agradese ba SEKOMS, liu husi servisu hamutuk ne’e, bele ona tulun ami suku Poetete Lodudu atu fó formasaun hodi nune’e ita bele promove potensialidade suku nian nomos problema oin-oin ne’ebé komunidade sira infrenta”, dehan Autoridade lokál ne’e.
Lideransa lokál ne’e enkonraja partisipante sira hotu atu bele ativu nafatin iha formasaun ne’e hodi bele hetan koñesimentu naton nune’e bele esplora diak liu tan informasaun husi suku ne’e.
Formasaun ne’e rasik hala’o durante loron lima (5) husi segunda to’o sexta feira semana ne’e, total partisipante hamutuk nain sanulun resin hitu (17)
Entretantu partisipa iha abertura formasaun ne’e Diretór Jerál Komunikasaun Sosiál Florindo da Costa, Diretór Diresaun Nasionál Dezenvolvimentu Media Adriano Monteiro, Xefe Departamentu Dezenvolvimentu Estudu Promosaun no Dezenvolviment Alberto da Costa Ribeiro, Xefe Suku nomos estrutura suku nian. *
