MetroFM; Tuir liafuan ida ne’ebé hateten, MATE husu ba MORIS. Tanba sá ema hotu hadomi O maibé sira ódiu los ha’u ?
Moris hatan tanba ha’u nia prosesu ne’e nakonu ho buat bosok no imajinasaun ne’ebé aas maibé O (mate) nia finalidade ne’e real no bainhira família ruma nia ema mate sira sente triste tebes tanba sira lakon ema.
Nune’e moris hanesan mane sempre la sees husi servisu hodi serbi família, sosiedade, nasaun no kreda, mane metan morena sempre hamnasa no umildade Nai Maromak hakotu nia vida iha hela oras servisu hanesan servidór ba rádiu komunidade Maliana, hanesan mós servidór ba informasaun lokál, servisu ba informasaun ne’e sai hanesan moto ne’ebé nia komunga metin ona iha fuan moris hodi serbi to’o mate iha servisu fatin.
Lala’ok moris ne’e mai husi jestór rádiu komunidade Maliana Filomino Gonçalves Magalhães, moris iha loron 27-07-1975 husi suku Ritabou postu administrativu Maliana, oan husi Clotilde de Carvalho no Joaquim Magalhães, oan da-sia husi maun-alin sanulu resin rua (12) no husi 12 ne’e na’in neen (6) mak fila ona ba Aman Maromak Nia Kadunan Santo.
Jestór rádiu komunidade Maliana hahú nia estudu SD Ritabou kontinua ba SMP 1 Maliana, SPP Covalima hahú 1994 remata 1997, matebian Filomino servisu iha rádiu komunidade Maliana husi tinan 2004 to’o 2013 hanesan jornalista, iha tinan 2014 to’o hakotu nia jornada moris asume knaar hanesan Jestór rádiu komunidade Maliana no membru sira ne’ebé servisu hamutuk ho matebian iha rádiu ne’e hamutuk ema na’in lima (5) feto haat (4) no mane ida (1).
Jestór rádiu komunidade Maliana Filomino Gonçalves Magalhães hahú sente moras ataka maka’as iha kinta feira (17-07-2025) maizumenus besik tuku 12:11 no membru rádiu komunidade Maliana bolu Ambulánsia lori kedas ba ospitál referal Maliana hodi halo tratamentu intensivu hafoun halo observasaun durante minutu rua nolu nia laran hodi transfere kedas ho aviaun mai ospitál nasionál Guido Valadares Díli tanba moras ho kondisaun grave.
Jestór rádiu ne’e hakotu is iha ospitál nasionál Guido Valadares iha kuarta feira (23-07-2025) oras tuku 21:00 kalan, serimónia funerál hala’o iha semitériu Santa Cruz Maliana.
Matebian husik hela fen Rosa Borges dos Santos ho oan na’in neen (6) maibé na’in rua fila hikas ona ba Aman Maromak Nia Kadunan Santo no daudaun ne’e hela na’in haat (4) feto tolu (3) no mane ida (1).
*
Hakerek testu : Eva/Elidio
Editora : Ana
